عاوز قلبك يرق

اغسل قلبك
عاوز قلبك يرق
نفسك تحس بالخشوع وتسجد وقلبك يسجد معاك
معلش...هي صعبة لأن قلوبنا عليها حاجات كتير ومحتاجة تنظيف وتلميع(مصدية)
شوية كلور على صابون سائل على
مية نار علشان السواد يطلع وتقدر تشيل القشرة الرهيبة اللي اتكونت على
قلبك من الذنوب والغفلات والفتن وصور الناس والمشاحنات والخصام والسب
والفيديو كليبات والنوم والأكل الكتير زيادة عن اللزوم
يا ريت كان الكلور ينفع
بس تعرف...ينفع نستغفر...ونستغفر...ونستغفر
ينفع نحمد الله ونسبح بحمده
ينفع نزور مريض في المستشفى في قسم الحروق علشان نعرف نار الدنيا ونخاف من نار الآخرة
ينفع نروح المقابر ونقف في صمت ونراقب القبور وهي تحفر وتملأ بالأجساد
ينفع نتأمل في ملكوت الله وروعة الطبيعة حتى تشهد أعيننا عظمته
ينفع نسمع صوت الريح والعصافير وحتى أصواتنا واختلافها علشان تشهد آذاننا بعظمته
ينفع نذوق أشكال وألوان م الأكل بنية التعبد علشان نعرف نعم الله علينا
ساعات الدنيا بتاخدنا بعيد
بعييييييد
لحد ما أرواحنا تبقى ثقيله
سماع القرآن وتلاوته في مكان هاديء بالبيت وإضاءة مريحة وتفكر في الآيات يساعد على الارتقاء بالروح
تفكرك للحظة في الموت..والكفن..والدود...والقبر
عارف القبر..أيوه الحفرة اللي حا تتحط فيها لوحدك وتتردم عليك بالتراب
والليل ييجي وانت لوحدك حتى أمك حا تسيبك حتى زوجتك حبيبتك مش حا ترضى تبات معاك وما حدش حا يعينك إلا نفسك
ياااااه
يا ترى لو افتكر كل شخص قادم على ارتكاب معصية شكل القبر وهيئته حا يكمل المعصية؟
حتى لو لسه مش حاسس بالخشوع
حتى لو ما نزلتش الدموع
كمل طريقك وكن على طاعة
الخشوع والدموع وحلاوة الإيمان هبة ونعمة من الله...أطلبها منه وأنت ساجد...
مش بإيدك ولا بإيدي ومفيش زرار تضغط عليه تلاقي الإيمان عندك طلع لفوووووق
كله بإيد ربنا عزّ وجلّ
خليك انت بس في وسط الناس الطيبة واعمل زيهم
تصدق وروح بنفسك للفقير وسلم عليه وبص في وشه واشهد فرحته
حاول
حاولي
على فكرة انت مش إنسان آلي مبرمج وحا تتبرمج 1..2..3..على طاعة وصلاة وخشوع وحا نعلى الزرار على الآخر علشان إحنا في رمضان....
لا
انت بني آدم
لحم ودم...نفس...وروح
ما تنساش إنك زي ما بدنك بيجوع روحك كمان جعااااااانة...وعاوز الغذاء اللي هو القرآن والذكر والتفكر في ملكوت الله
الجنة مش ببلاش
والطاعة عاوزة صبر
ورمضان فرصة وبركة وخير
اللهم اسمح لنا بطاعتك وأرزقنا خشيتك وعرفنا طعم حلاوة الإيمان